అంతట..ఆ ధీరోధాత్త మహా రాజు..తనని సైనికులు కొట్టెనని వలవలా ఏడ్చెను..! న్యాయాధికారి కళ్లు చెమర్చెన్

 

వీడియో ప్రసంగాలకు, గొట్టాల ముందు వీరాలాపాలకు..వాస్తవ పరిస్థితికి చాలా తేడా ఉంటుంది. అంతెందుకు ఎక్కడో కూర్చుని నేను ఇలా రాతలు రాస్తున్నానంటే అంత తొందరగా మనపై ఎవరూ పడరనే బింకమే కారణం. అలానే ఓ మహారాజు..తన చక్రవర్తి( ఆయన భాషలో సామంత చక్రవర్తి లేదంటే సామంతరాజు)పై యథేచ్చగా యథాలాపంగా మంచినీళ్ల ప్రాయంగా ఆరోపణలు..ప్రేలాపనలతో కూడిన ఏకపాత్రాభినయం చేస్తూ ఆంతేవాసులను తెగ రంజింప జేసెను ఐతే ఇది చక్రవర్తికి ఎక్కడో కాలెను..దీంతో సమయము చూసి కలుగులోని ఎలుక బైటికి రాగానే పట్టుకున్నట్లుగా పెడరెక్కలు విరిచి పట్టుకురమ్మన్నట్లుగా భటులను పంపడమే

తరువాయి గూఢచార భటులు ఆతనని తోడ్కొని న్యాయాధికారి ఎదుట ప్రవేశపెట్టెను..ఐనచో..ఈ మూషికరాజు కడుంగడు గడుసరి కావటము చేత వెంటనే తనకి అన్ని అనారోగ్యములు గుర్తుకువచ్చెను..కాళ్లు తడబడెను..భటులు తనపై దాడి చేసినట్లుగా భ్రమింపజేసినవిధముగా పరిపరివిధములు నడకను అభినయించెను..వార్తాహరులు వెంటనే ఈ సమాచారామును దూరదర్శనము ద్వారా ప్రజలందరి ముందు పెట్టెను..అయినను గిట్టనివారు ఇది ఆయనకు మార్గమధ్యమున వచ్చిన ఆయాసముతో కూడిన పాదముల వాపు తప్ప ఆయనపై ఎవరును చేయి చేసుకొనెడి  ధైర్యము చేయరని గుసగుసలాడెను..అయినను ఓ వేళ ఆ రాజుపై దాడి జరిగిన చక్రవర్తి నిజముగా మూర్ఖులే అని కొందరు అభిప్రాయం వ్యక్తము చేసెను. వాస్తవము ఏమిటనేది వైద్యుల బృందము తేల్చనున్నది

ఐనను..ఈ మూషికమహారాజును ఉసిగొలిపిన ప్రసారమాధ్యమాలు ఆ రాజ్యంలో ప్రవేశించనవసరం లేదు కావును యధేచ్చగా తమ అభిప్రాయాలను ప్రజాభిప్రాయంగా ప్రసారం చేయుచూ సదరు మూషికము ఆరోగ్యంపై ఎనలేని ఔదార్యం, ప్రేమ అభిమానం, వాత్సల్యం చూపించిడం సాగించెను..అంతట ప్రజలందరూ అరరే మన మూషికరాజు శరీరంలో ఇంతటి అనారోగ్యము పెట్టుకుని కూడా రోజూ మన ముందు ఎంతటి రంకెలు వేసెను..ఎంతటి తెగువ చూపెనంటూ నోరు నొక్కుకోవడం ప్రారంభమైనది..

ఇంత జరిగిననూ చివరకు ఈ మూషికరాజునకు న్యాయాధికారి విడుదలే చేయును కానీ..ఇంతలో ఇంత జంఝాటము ఏమిటని ప్రజలు ఊసులాడుటపై మాత్రం ఈ ప్రసారమాధ్యమాలు పట్టించుకొనజాలవు..ఏది ఏమి అయిననూ..హస్తినకు పోవలె..న్యాయము తేలవలె..